IIIT ki aakhiri raat...

Sahi kehte hain ki judaav ka pata tabhi chalta hai jab hum alag hote hain. yeh rule har ek cheej par laagu hota hai. 11/1/12 ko raat 12 baje, jo ki asal mein 10 taarikh ki raat thi, pankaj ka janmdin bhi manaya jana tha aur skandh, mukund, prakhar aur sanjeev ne mujhe farewell dena ka bhi plan banaya tha. wahi jagah jahan par humne pehli get togather celebrate ki thi aaj meri farewell ki gawah banne wali thi.


Hamesha main kisi na kisi cheej ke liye iiit ko doshi thehrata rehta tha. iiit mein shayad yeh meri iklauti raat thi jab mujhe kuchh ajeeb sa lag raha tha. main kal ja raha tha iiit se. hamesha ke liye. kuchh der pehle tak main bahut khush tha lekin felicity ground par apne aap ko badi mushkil se sambhala tha. lag raha tha ki mera ek hissa kuchh din ke liye phir bhi yahna reh jayega mere doston ke saath aur main har kisi mein se kuchh na kuchh apne saath le jaunga.

Mujhe kuchh bolne ke liye aage aana pada aur tab maine pehli baar mehsoos kiya ki thoda thoda karke in sabne mere liye kitna kuchh kiya hai. skansh ki khaass kar ke bahut yaad aayegi. he is the best room partner i ever had. kafi logon ne kuchh na kuchh bola, sharad, prakhar, skandh, sanjeev, brijesh, anil aur netal.

Brijesh ne sabke saamne mere ek crush ke baare mein bola jo waise tha nahin par maine sabko sahi baat batayi. apne aap mein ek bilkul alag sa ehsaas raha mera iiit mein aur shayad main ise kabhi bhula na paun. maine yahan shayad kuchh hi bahut kareebi dost banaye honge par haan kareebi bahut sare the.

Sahi maaynon mein in logon ne mujhe jhela tha. har ek kadam par meri madad ki. main good byes itne achchhe se nahin kar pata par phir bhi himmat jutani padi. main degree to poori nahin kar paya lekin kafi kuchh cheejein yahan se seekh kar ja raha hoon. padhai, dosti, jimmedari aur kayi ankahe se ehsaas mujhe yahan se mile.

Yeh sab log yaad jarur aayenge aur kuchh to shayad bhulaye hi na ja sakein. pehli baar shayad apne decisions se maine kuchh seekha tha. us se doori badhna ya badhana, MS lena aur yahan ke doston par kam bharosa karna in sab mein se kuchh the.

Shayad aage zindagi mein koi faisla lene se pehle har pahloo par bahut achchhe se soch vichaar karun......................

Maaf karna doston, main kabhi DU ko apne se alag hi nahin kar paya aur uske itne kareeb raha ki tumhare kabhi kareeb hi nahin aa paya..............

Aakhir mein mujhe skandh aur prakhar station par chhodne aaye. pata nahin cab mein kyon ek ajeeb si khamoshi thi. bahut kuchh bolna chahta tha par chup tha. station par bhi bas prakhar ko thanks bol paya aur skandh ko phir se kuchh nahin. shayad usko main kabhi bhi na bhula paun. ek ajeeb si saadgi aur shaitani, kuchh alag sa tha woh. meri kismat achchhi thi ki main ek saal uske saath bita paya.................

Train ka time ho hi chuka hai aur bas mera safar shuru hone wala hai. kuchh chhodkar aur kuchh saath lekar bas main nikal pada hoon...........